97
+ IN NOMINE DOMINI NOSTRI IHESU CHRISTI. Anno ab incarnatione
eiusdem millesimo octogesimo secundo. Indictione quinta. Ego Robertus
universorum dispositoris permissione. dux apulie. calabrie. et sicilie.
una cum coniuge mea. Sikelgayta. et filio nostro rogerio. dedimus. et sub
donationis testamento designavimus. mense ianuario. ecclesiam sancti arontii
de tarento. monasterio Sancti Laurentii aversano. et abbati eiusdem loci.
et aliis secundum Sancti Benedicti regulam. eidem predicte ecclesie iuste
succedentibus cum omnibus illis que ex nostra parte. secundum iustitiam
dare et concedere sibi possumus. tam in terris quam in vineis. mobilibus
et inmobilibus. Preterea huic donationi superaddimus unam piscariam. que
fuit landonis predicte civitatis tarenti vicecomitis. Concedimus insuper. ut
ubicumque sint monachi prefate ecclesie in toto honore nostro. nullas penitus
vendendi. vel emendi consuetudines reddant. nec aliquis ab eis plateaticum
de rebus suis exigat. dedimus prefate elemosine. ut si homines.
prefate ecclesie aliquid forte foris fecerint hominibus nostris. non sit aliquis
de nostris. ita temerarius. vel audax. et eum sine clamore monachorum.
aliquo modo iustificare presumat. Sed predictis monachis. prius proclamationem
faciat. et per manus eorum postea iustitiam abeat. Concedimus
etiam prefate ecclesie. ut sicut homines nostri in terra nostra. alienos homines
affidare possit. ita etiam et predictis monachis. affidandi quoslibet in
terra nostra potestatem tradimus. Quicumque ergo hoc preceptum proprio
sigillo bullatum infirmare voluerit vel presumpserit. centum solidos aureos.
ad curiam nostram componat. Ego vero Wuillelmus Regiensis ecclesie electus
huius donationis et carte estiti testis et notarius.
|