|
335
† In Dei nomine. Anno dominice incarnationis millesimo centesimo tricesimo secundo, Lothario rege, mense augusto, indictione decima. Cum ea que geruntur variis nominibus contractuum denotentur, iccirco litterarum inscriptio perquam utillima est, ne aliqua in posterum tempus oriatur dubitatio. Quapropter in Dei nomine manifeste sumus nos mulieres Rosinberga filia quondam Pepolini uxor Offriducii filii quondam Tetuzonis, ac Ribera filia iamdicti Offriducii uxor Ugonis filii quondam Panzolini de Achidiacono per consensnm ac licentiam suprascriptorum virorum nostrorum ac cum notitia et interrogatione Saraceni iudicis domni Heinrici, a quo secundum legem interrogate ac inquisite sumus, in cuius presentia ac testium subterscriptorum certas facimus professiones, quia bona ac spontanea nostra voluntate et nullo cogente aut vim faciente neque a suprascriptis viris nostris vim passas esse dicimus, una cum eis ac ipsi nobiscum, seu et nos Offriducius et Ugo ac Rodevacca et Alvisia soror predictorum Ugonis ac Rodevacce, per eorum licentia, et ego Offriducius ac Ugo obligantes nos pro nobis ac pro tota parte nostra et pro alio fratre meo suprascripti Ugonis, nos omnes una cum suprascriptis mulieribus nostris, qualiter per hoc scriptum transactionis; finitionis ac promissionis et perpetue obligalionis, renuntiationis, refutationis, stantie et convenientie et aquiliane stipulationis et acceptilationis, ad rescindendam omnem actionem in rem ac in personam sive ex contractu vel quasi contractu, vel ex malefitio vel quasi malefitio, vel ex nominatis contractibus, finimus, transigimus, refutamus, renuntiamus tibi domno Iohanni abati monasterii sanctarum virginum Flore ac Lucille et nominative Buamundo filio Guilielmi Bosonis ac omnibus adiutoribus suprascripte ecclesie, omnes lites, actiones, causationes, molestationes, repetitiones, sacramenta, homicidia, incendia, devastationes, asaltus et omnia malefitia a primo die et eo computato quo lis incepta fuit inter nostram eclesiam et adversariam partem ex castro de Fontiano usque nunc, vel pro ea occasione vel ex ea, aliquo modo aliquove ingenio commissum est, et ut hec omni tempore firma teneamus, sacramento a nobis corporaliter prestito, in brevibus continetur, firmavimus, reddita nobis possessione omnium rerum per vim ablaturum et accepto pretio pro suprascripta transactione. Et insuper aquiliana stipulatione et acceptilatione firmavimus omnes nos suprascripti, dantes licentiam suprascripto Ugoni, ut hec decideret. Qui Ugo interrogavit suprascriptum abatem trina vice pro se ac pro sua parte: Domine abbas, promittis michi dare ac restituere, concedere omnia quocumque modo nobis debes et ut supra legitur? Respondit abbas trina responsione: Promitto. Et e converso interrogavit abbas suprascriptum Ugonem trino modo: Ugo, habes acceptum quod tibi promisi? Respondit Ugo trina responsione pro se ac sua parte: Habeo, acceptumque tuli. Exinde obligamus nos ac nostros filios et heredes vel alias succedentes suprascripti iugales ac fratres et soror si contra suprascripta presumpserimus aliquo ingenio agere, causari vel per placitum aut extra fatigare, aut si omni tempore ab omni persona non potuerimus defensare, aut si apparuerit datum factumve huic rei nociturum per aliquod ingenium, vel si non defensaverimus, tunc obligamus nos ac nostros filios et herdes vel alias succedentes nos omnes suprascripti ac suprascripte et pro tota nostra parte tibi domno Iohanni abati ac Buiamundo ac omnibus vestris successoribus et heredibus et toti vostre parti composituros et componamus penam centum librarum argenti; et postea hoc scriptum sit firmum in perpetuum. Unde hoc scriptum nobis rogatum est et inviolabiliter constitutum. Actum in castro de Pinli feliciter.
††††† Signa manuum suprascriptorum iugalium ac fratrum et sororis, qui hoc scriptum scribi rogaverunt.
††††††† Signa manum Ugonis Uberti et Ugonis filii Rainerii Ugonis et Miniketti filii Ugonis et Gualtierii filii Marcucci et Rainerii filii Ratucii et Rainaldini filii Ugonis et Rodulfini filii… rogatorum testium.
// Ego Saracenus iudex ab inperatore huic offitio delegatus supradicte transactioni
interfui et subscripsi.
† Ego Guilielmus iudex ac notarius scripsi et complevi.
| |