|
332
† Creator cum munere pietatis fungeretur post irrationabilia rationalem condidit creaturam, que regendum exhiberet rationis regimen et naturam, ut que habebat a summo rege principium haberet insitum summa cum providentia regendi consilium, et esset largitio imperantis cognitio procuratoris et benivolentia servientis non devia exibitione mandati. Constat igitur Deum non otiose hominem homini etiam preesse voluisse, ut et subditorum humanitus tractaretur utilitas et prelatorum in regendo divinitus exiberetur humanitas, cui tanto gratius prelati deservit offitium quanto servis Dei diligentius in custodiendo rationis et misericordie largitur obsequium. Quocirca ego Buianus Dei gratia aretinus episcopus ac comes tibi domno Azoni camaldulensis ecclesie archimandrite tibique successuris in posterum, affectu pietatis considerans quid pro te rebusque tibi commissis faciat, quid obsistat, dispono disponendo, confirmo confirmando per tabellionem conscribo me illam de cetero vobis exhibiturum cautelam, quam pater filiis karissimis pietatis impertitur affectu, ut que vobis solatiantur vel adversantur michi quoque credam profutura vel nocitura et eiusdem fortune eventu me quoque sublimari vel deprimi. Ideoque quod meorum antecessorum, scilicet Teodaldi episcopi, item Constantini, Gualterii ac Guidonis contullere rescripta, a me visa ed ante me perlecta, celebri dispositione confirmo, ut que nunc habetis ac tenetis, vel si non tenetis iure tenere debetis, vel dehinc Deo propitio adquiretis, vobis ac vestris successoribus inconcussa perseverent, nulla alicuius persone temeritate violata, sed a me meisque successoribus inviolabiliter custodita sub pene interminatione anime corporisque dispendio et perpetui anathematis periculo, sive sit donatio, que ex alicuius liberalitate vestra lucratur ecclesia, vel quevis alienatio, vel alicuius rei respectu pietatis translata concessio. Preterea pro remedio anime meę ac meorum successorum meorumque parentum concedo, confirmo vobis quicquid habeo ac teneo aut aliquis nomine meo detinet in loco, in manso qui dicitur de Cetini. Item integras letanias de plebe de Miciano, que est prope castrum quod dicitur Angulare. Insuper etiam omnibus menbris vestris vobis in Christo subpositis eandem affectionem, eandem cautelam observare polliceor, ita tamen si per vos non steterit emandatio, post inquisitionem a me vel meis successoribus factam si nobis aliquatenus offenderint. Ut igitur hec, que supra confirmata et concessa sunt, nulla presumptionis temeritate violentur, inibemus omnibus ex parte Dei omnipotentis ac beati Donati martiris et nostra sub honere etiam banni episcopalis, ut nullus clericus, nullusque laicus predictis nostris confirmationibus vel concessionibus audeat obviare, vel disvestituram aut violentiam aliquam inferre, minuendo, molestando, inquietando. Huius etiam nostri privilegii paginam sancti Donati effigiem referentis sigilli impressione roborando signare iussimus, manu propria subscribendo confirmavi.
† Ego Buianus Dei gratia episcopus et comes omnia supradicta confirmo vobis devotus in omnibus. Ego Ugo primicerius ss. atque confirmo. Ego Dominicus presbiter et canonicus ss. Ego Heinrigus aretino ecclesie prepositus ss. et confirmo.
†Ego Rainerius aretine ecclesie archidiaconus ss. et confirmo. Ego Iohannes presbiter et canonicus ss.
Data iuxta ecclesiam beati Michaelis in suburbio aretino civitatis millesimo c. tricesimo secundo, residente papa Innocentio, mense madio, v kl. iunii, indictione x, sub presentia horum testium, videlicet Tribaldi filii Ubertini et Alberti filii Guilielmi Saxonis et Paganelli de Orzale ac Rigetti Panzonis de Capannole et Rolandini Pagani ac Pagani Aritii Fusconis et Rigonis filii Iohannis et Bosetti Ugonis et Gregorii filii Pagani ac Lodomerii et Ordelaffi filiorum Aldebrandi. Actum in prasentia domni Rolandi et domni Azonis.
// Ego Saracenus iudex huic officio ab imperatore delegatus prescriptis confirmationibus interfui et ss. †† signa manuum Vicedomini et Aldebrandini advocati rogatorum testium.
Ego Guilielmus notarius ad iussum predicti episcopi scripsi
| |