Guido de Columnis: Historia destructionis Troiae

Pag 136


acierum, totus in occisorum sanguine cruentatus, quinque uix
reperit in quem exercere ualeat uires suas.
Tunc Menesteus, dux Athenarum, uenit ad bellum cum tribus
milibus armatorum, et eundo cum tota gente illa ex parte sinistra
peruenit ad aciem illorum de Frigia, in qua erat Troylus, qui Grecos
mirabiliter opprimebat, et in qua erat rex Anthipus, rex Macaon,
et rex Alcanus, qui aciem ipsam cum ipso Troylo ducebant. Et
facta commixtione ipsarum acierum, letale bellum potenter committitur
inter eos. Tunc Menesteus dux bellantem Troilum potenter
agreditur cum lancea sua, sic uiriliter ipsum impellens quod,
uelit nolit, Troylum ab equo prosternit. Qui in medio tot pugnancium
peruenit in terram in locum mirabiliter impeditum, cum
decidisset inter pedes innumerabilium equorum et assessorum ipsorum,
qui letale bellum sub mortis dubio tota intencione tractabant.
Menesteus uero circa capcionem Troyli totus anhelans, vt ipsum
suum habere ualeat in captiuum, cumulando uires uiribus, cum
omnibus suis tantum studii adhibuit et laboris quod Troilum a
pedibus equorum abstraxit, cepit eum, et captiuum ducere in multa
militum phalangia festinat. Sed quidam miles, nomine Miseres,
aduersus illos de Frigia potenter exclamat dicens: "O viri fortes,
ad quid venistis ad bellum? Nunquid pro honore uel uerecundia
acquirenda? Nonne percipitis et videtis Troilum, filium regis Priami
et fratrem Hectoris, duci captiuum? Sane si permittitis eum
duci, perpetui pudoris labe uos et heredes uestros poteritis tenere
fedatos. in recuperacione igitur ipsius conuertite vires vestras
et hoc facere cum celeritate curetis antequam a potencia vestrarum
virium eruatur. " Tunc rex Alcamus excandescens totus in iram,
accepta quadam lancea, contra Grecos, qui Troilum captiuum ducere
festinabant, festinanter irruit, et sic uiriliter percutit cum
eadem vnum ex eis quod ipsum subita morte prostrauit. Deinde
prosiliens in alium, ipsum letaliter uulnerat. Quare factum est
cum auditorio suorum occurrencium cateruatim quod Troilus a

Torna all'inizio