6. Ex hinc usque quo salutem virgo mundi peperit,
quem prophetae praedixerunt venturum Emmanuel,
octodecem et quingenti peracti sunt circuli.
7. Rex eternus mundum venit restaurare perditum,
quinque milia expletis annis a principio
centum atque nonaginta novem hinc per calculum.
8. Glorioso ab adventu redemptoris omnium
ad hunc usque prima annum in quo est indictio,
septingenti sexaginta tresque simul anni sunt.
9. Alta pace nunc exultat Ausonia regio,
Desiderio simulque Adelchis regnantibus
florentissimis et piis, cum haec annotata sunt;
10. Principatum Beneventi ductore fortissimo
Arechis regnante freto superni auxilio
Adelperga cum tranquilla stirpe nata regia.
11. Iudex veniet supernus velut fulgor caelitus,
dies sed aut hora quando non patet mortalibus,
felix erit quem paratum invenerit dominus.
12. Ante tuum, iuste iudex, dum steterit solium
Arechis benignus ductor cum praeclara coniuge,
dona eis cum electis laetari perenniter.
-------------------------------------
VERSUS IN LAUDE SANCTI BENEDICTI.
Diebus Iustiniani orthodoxi imperatoris beatus Benedictus pater, qui monachorum
regulam instituit, et prius in loco qui Sublacus dicitur, qui ab urbe Roma quadraginta
milibus abest, et postea in castro Casino, quod Arx appellatur, et magnis vitae meritis
et apostolicis virtutibus fulsit. Cuius vitam, sicut notum est, beatus papa Gregorius
in suis dialogis suavi sermone composuit. Ego quoque pro parvitate ingenii mei ad
honorem tanti patris singula eius miracula per singula distica elegiaco metro contexui:
Ordiar unde tuos, sacer o Benedicte, triumphos?
Virtutum cumulos ordiar unde tuos?
|
|