Iohannes de Procida (attr.): Liber philosophorum moralium antiquorum

Pag 459


Et dixit: habere modicum et sufficere est honor; habere multum
et non sufficere est dedecus. Et dixit: societas sensati et requies,
et ignorantis est labor. Et dixit: cum ignoraveris exquire, et
cum erraveris corrige, et cum male feceris peniteas, et cum peniteas
non recidas; et cum aliqua bona peregeris occultes, et
cum ea non feceris, bonam excusationem exhibe. Et dixit: qui
bene agenti gratam retributionem impendit, debitum compensat.
Et dixit: non associeris non cognoscenti se, nam cum tali non
potes bonam vitam ducere. Et dixit: illius, qui non curat de eo
quod perdit, anima quiescit et sensus clarescit. Et dixit: ille qui
non gratificat bona sibi collata, non recipiet in bonis propriis
incrementum; et qui redarguit se ipsum, assecuratur de redargutione
alterius. Et dixit: compositus est qui moderatur suam
vitam et habet verbi sui custodiam. Et dixit: non pudeat te
querere veritatem cuiuscumque dicentis, quia veritas in se nobile
quid est, et sua nobilitate suum nobilitat referentem. Et dixit:
quod facit hominem excusari a dedecore, est melius diviciis dedecora
inducentibus. Et dixit: defectivus non potest sui ipsius
percipere deffectum, et si perpenderet excessum alterius comparatione
sui dolorem haberet. Et dixit cuidam qui fugiebat de
bello devictus: male facit fugiens mortem ut veniat ad ignominiosam
vitam. Et dixit quando extraxerunt eum de carcere
ut occideretur, videns uxorem suam plorantem: cur ploras? Cui
dixit: quomodo plorare non debeo cum te videam contra rationem
occidi? Et dixit Socrates: velles magis quod secundum
iusticiam me occiderent, quam contra? Et dixit: miseri excludatis
miseriam vestram a morte, sciencia vestra. Et dixit: qui
errat priusquam in se veritate utatur, est indulgendum eidem;

Torna all'inizio