Pag 7

QUALITER AMISSA EST DAMIATA. - Anno Domini 1221 cum exercitus Christianorum ad
superiores partes Egypti expugnandas transisset inundatione Nili est subito circumfusus. Cumque
Christiani procedere possent nec redire valerent, aquis et exercitu Saracenorum undique
circumsepti, coacti sunt pro redemptione sua reddere Damiatam; dimissique a Saracenis, ad
propria cum tristitia maxima sunt reversi. Porro Egyptii letati sunt de protectione eorum,
quia timor eorum incubuerat super eos.
DE LODOVICO REGE FRANTIE. - Anno Domini 1222 apparuit cometa in mense septembris.
Tempore subsequenti obiit Ludovicus rex Frantie qui multum pro ecclesia laborabat
contra Comitem tolexanum fatorem hereticorum et audacissimum defensorem. Cui successit
in regno eius filius Ludovicus.
DE TERRE MOTU MAGNO. - Anno Domini 1223 in die natalis Domini, inter sextam et
nonam horam per totam Italiam factus est maximus terremotus; sed super urbes Italie civitas
brixiensis incredibiliter conquassata maximum dampnum sustinuit in rebus, domibus et personis.
DE OBSIDIONE FERRARIE. - Anno Domini 1224. Azo marchio et Ricardus comes Sancti
Bonifacii cum Veronensibus et Mantuanis Salinguerram in Ferariam obsiderunt. Sed ille cum
multum esset callidus et astutus, Comiti sub compositionis spem intrare Ferariam persuasit;
capiensque ipsum et omnes qui secum erant ingressi, ab obsidione Ferariam liberavit. Post
modicum vere temporis, facta compositione, comes fuit a vinculis absolutus.
QUALITER FEDERICUS HABUIT REGNUM JEROXOLIMITANUM. - Eodem anno circa hec tempora,
mortua Beatrice imperatrice, filia regis Aragonum, de qua regem Alemanie Henricum
habuit imperator, ipse Isabellam, filiam Iohannis regis jeroxolimitani accepit in uxorem; de
qua genuit Corradum quem dilexit tenerrime super omnes. Et sic regnum jeroxolimitanum
occasione huius matrimonii est adeptus.
DE PRODITORIBUS VERONE. - Anno Domini 1225 multi viri nobiles et potentes ex parte
comitis Sancti Bonifacii, corrupti pecunia Salinguerre, Monticulis adherentes, virum clarissimum,
comitem scilicet Rizardum, cum sua parte subito de Verona expulerunt. Et tunc
primo pessimus Ezelinus adiungens se predictis, incepit habere dominium in Verona. Mantuani
vero Comitem cum amicis suis sub protectione alarum suarum amicabiliter receperunt,
ipsumque in preliis et modis omnibus adiuvabant. Tandem post malorum perpetrationem
facta fuit compositio inter Comitem et adversarios, mediantibus rectoribus Lombardie.