XI
De undecima parte
Quae est de quaestionibus
Haec pars diuiditur in duodecim partes seu loca, disposita et
proportionata ad quaestiones, secundum materiae diuersitatem,
ex qua sunt. Nam in uno loco siue parte est significata solutio unius
quaestionis, et in alio loco solutio alterius quaestionis. Propter
quod diuersimode applicabimus quaestiones ad praedicta loca.
Et hoc duobus modis, uidelicet faciemus aliquas quaestiones,
quas soluemus; et alias, quas non soluemus, similiter faciemus. Et
istas dimittemus artistae bene intuenti, ut ipse bene abstrahat
solutionem ab illa parte siue loco, cui quaestiones transmittemus;
nam in illa parte siue loco solutio est significata. Hic uero paucas
quaestiones faciemus et soluemus causa breuitatis. Nam haec Ars
abstracta est ab Arte magna, ut ipsa breuius tractetur ut
intellectus sub paucis uerbis apprehendat multa. Et sic intellectus
est magis uniuersalis. Et per solutiones istarum quaestionum,
sic positas seu datas, poterit dari solutio aliarum quaestionum suo
modo.
Loca siue partes, ad quas transmittemus quaestiones, sunt
duodecim, ut iam supra dictum est, uidelicet: (1) Prima figura, (2)
secunda figura, et (3) tertia figura, (4) quarta figura, (5) definitiones,
(6) regulae, (7) tabula, (8) euacuatio tertiae figurae (9)
multiplicatio quartae figurae, (10) mixtio principiorum et regularum,
(11) nouem subiecta, (12) centum formae.
Et primo de prima parte siue loco dicemus.
|
|