Protheus est monstruosus in diversis vultibus,
Modo ridet, modo plangit amixtis singultibus,
Nocte carnibus abutens, die tantum pultibus.
Magi Symonis adeptus omnino mendacium
Et Synonem mentiendo vincit et Acatium,
Arrium et Manicheum, Zarohen, Ursacium.
Marsos quidem superando in suis accantibus
Superis nigros presentans coram circumstantibus
In meridiano cursu se iungit bachantibus.
Suis autem phantasiis turbat omne seculum
Et imperii rectorem nec non cetum presulum
Nullum penitus obmittens puerum aut vetulum.
Imperator Romanorum HEINRICUS tercius
Folleprandi malam famam scire volens cercius
Romam venit; cui portas claudit Stercorentius.
Ruptis muris imperator triumphans introiit;
Merdiprandus fugam capit; hunc venisse doluit;
Ut hyena quodam trullo latitari voluit.
|
|