Geremiorum de Bononia et eorum sequacibus de Romania, omnes, tanquam Herodes et Pilatus
facti sunt amici. In die mercurii XIII novenbris anni presentis, in mane summo, [ante quam
illu]cesceret, fractis ferramentis et ianuis porte Imilie sive Imolensis, quam pre ceteris [conser]vabat,
in civitatem Faventie introduxit Fantullinum et Tanum filios condam domini Ugolini
de Fantullino, cataneos de Saxadello, comitem Bernardinum de Cunio, fratrem Alberigum et
Manfredum de Manfredis, dominum Guidonem de Polenta de Ravenna, Nordiglos de Imola,
partem Geremiorum de Bononia, cum omnibus et singulis eorum et quorumlibet predictorum
sequacibus. Qui omnes, tanquam leones avidi et intenti ad predam ipsam civitatem irruentes,
quotquot potuerunt gladio occiserunt, alios vulnerantes, alios carceribus recludentes, reiectis
et expulsis atque fugatis omnibus de parte Acharixiorum et Lanbertaciorum, quibusdam ex
eis armatis, aliquibus inermibus, et multis ex ipsis absque pannis et calciamentis propriis; ita
ut, ante horam tercie dicti diei mercurii, relictis domibus et spoliis singulorum, ipsa civitas
Favencie, plena bonis omnibus, pane scilicet atque vino, carnibus vivis et mortuis, pannis et
pecuniis infinitis, in dominio predictorum derobatorum remansit. Qui Deum pre oculis non
habentes, nec considerantes quod multa et infinita mala et danpna potuerunt in eorum
personis et bonis aliis retroactis tenporibus evenire, tanquam canes famelici domos intrantes,
derobaverunt eas; ecclesias insuper et loca religiosa, specialiter domos, [locum et]
ecclesiam sancti Iohannis evangeliste fratrum Heremitanorum, domos, [locum] et ecclesiam
sancti Francisci fratrum Minorum de[robant]es omnibus rebus et bonis, tam illorum, qui in
ipsis domibus scanpaverant, quam etiam ipsarum domorum et fratrum. Et audite inmanitatem,
et videte inhumanitatem crudellissimorum et inpiorum Christianorum, qui, non contenti bonis
et rebus et substanciis eorundem, ipsos sacerdotes et clericos et religiosos ac etiam plurimos
laicos, qui timentes ad ecclesias confugerant, et exclamaverant in eisdem, sicut homicide
et omnes malefici possunt exclamare et refugium habere de iure, alios occiderunt, alios
mortis articulo vulnerarunt, alios duris carceribus intruserunt. Illi vero, qui ex ipsa civitate
|
|