trecentos milites de Laudensibus et L. de Pergamensibus
nunc ceperunt, preter mortuos quorum numerus non habetur,
de quo gaudete nobiscum, et debeatis merito exultare.
CII.
Prelati capti a piratis et detenti in carcere scribunt pape
pro auxilio.
Sanctissimo patri et domino Gregorio Dei gratia summo
pontifici, et venerandis fratribus eius cardinalibus universis
omnimoda honestate ac discretione conspicuis, I(acobus) prenestinus
episcopus, et O(ddo) Sancti Nicolai in carcere Tulliano
diaconus cardinalis, tales archiepiscopi, tales episcopi,
tales abbates et priores et fratres predicatores et minores et
alii religiosi eidem associati pedum oscula beatorum. Insinuare
vestre clementie voce flebili cogimur instantem angustiam
et dolorem, qualiter dum vocati veniremus ad vestre
concilium sanctitatis, et aura flante prospera nostre rates undas
maritimas pertransirent, cum suis galeis occurrentes Appuli
velociter exadverso, post longum conflictum et interitum
plurimorum, imbecillitatem nostram sue potentie submiserunt,
illius iudicio permittente qui multotiens malos permittit
in sua malitia prevalere. Et sic in civitate Pisana sub iniqui
principis custodia requiter detinemur, licet ad ostentationem
aliqua reverentia et honorificentia fiat nobis. Unde vestre paternitati,
qui vices viventis Dei gerere comprobamini, flexis
genibus supplicamus, quatenus non solum in hac parte, qui
mortem subire pro ecclesia non timemus, sed universalis ecclesie
saluti dignemini providere.
|
|