Guido Faba: Dictamina rhetorica

70


CXXXII.
De archiepiscopo ad archiepiscopum.
Reverendo in Christo fratri I. divina miseratione Mediolanensi
archiepiscopo S. Dei gratia Ravennas archiepiscopus
salutem et sinceram in Domino caritatem. Ardua negotia nostre
provincie requirunt generale concilium celebrari, ut super
multis excessibus post inquisitionem factam in capite pariter
et in membris correctio et reformatio debita subsequatur, et
auctoritate Romane ecclesie fiant canones generales. Unde
vestram benignitatem deprecamur, ut tali loco et die velitis
cum vestris ac nostris episcopis interesse.
CXXXIII.
Responsiva ad eamdem.
Invitati per vestras litteras, citatis nostri episcopis ad
concilium, prefixo termino veniemus, una vobiscum illa, volente
Domino, tractaturi, que spectabunt ad honorem corporum
et salutem pariter animarum.
CXXXIIII.
De episcopo ad episcopum super ordinatione clericorum.
Fratri carissimo, reverendo in Christo et plurimum diligendo
T. apostolice sedis dignatione Ferrariensi episcopo
G. Dei gratia episcopus Cremonensis salutem in eo qui dat
salutem omnibus et conservat. Implicati multis negotiis, ordinationibus
clericorum intendere non possumus, ut vellemus.
Quare vestram prudentiam deprecamur quatenus, si consecrationem
feceritis, U. et T. presentium portitores amore nostro
velitis ad tales ordines promovere.

Torna all'inizio