que utilitas in arguendo? Audi Prover. XXIIII: Qui arguunt laudabuntur,
et super ipsos veniet benedictio.
Sequitur in auctoritate Apostoli: ad corripiendum. Iere. X:
Corripe me, Domine, verumtamen in iuditio et non in furore tuo,
ne forte ad nichilum redigas me. Idem dicit Propheta: Domine,
ne in furore tuo arguas me neque in ira tua corripias me. Item Prover.
XVII: Plus proficit correptio apud prudentem quam centum
plage apud stultum. Quod patuit in Iosue, quem corripuit Moyses,
Numeri XI: Quid, inquit, emularis pro me? Quis tribuat ut
omnis populus prophetet, et det eis Dominus spiritum suum?
Impletum est in Moyse quod dixit Sapiens, Sap. VI: Neque cum
invidia tabescente iter habebo, quoniam talis homo non erit particeps
sapientie. Item in Herode impletum est quod dictum est supra:
quam centum plage apud stultum. De quo dicitur, Luc. III: Herodes
autem thetrarcha cum corriperetur a Iohanne de Herodíade
uxore fratris sui et de omnibus malis que fecit Herodes, adiecit et
hoc supra omnia et inclusit Iohannem in carcerem. Quare hoc?
Quia, ut dicit Sapiens in Proverbiis XV: Non amat pestilens eum
qui se corripit nec ad sapientes graditur. Nam, ut dicit Amos V:
Odio habuerunt in porta corripientem et loquentem perfecte abominati
sunt, scilicet Herodes et Herodías. Sed dicitur Eccli. XXI:
Qui odit correptionem, vestigium est peccatoris; et qui timet Deum
convertetur ad cor suum. Item Eccli. XIX: Qui odit correptionem
minuetur vita. Item Eccli. XX: Quam bonum est correptum manifestare
penitentiam; sic effugies voluntarium peccatum. De correptione
multa habes Eccli. XIX. Item Eccli. XXXII: Peccator
homo vitabit correptionem et secundum voluntatem suam inveniet
comparationem. Hec omnia completa sunt in Herode, qui malitiose
cum Herodíade de morte Iohannis Baptiste tractavit. Item
de Iohanne dicitur, Prover. XXI: Excogitat iustus de domo impii,
ut detrahat impios a malo. Item de Herode dicitur, Prover. XXIX:
Viro qui corripientem dura cervice contemnit, repentinus superveniet
interitus, et eum sanitas non sequetur.
Sequitur in auctoritate Apostoli: ad erudiendum. Prover.
XVI: Eruditus in verbo repperiet bona, et qui in Domino sperat
beatus est. Ideo dicit Prover. XIX: Erudi filium tuum, ne desperes:
|
|