Mutinenses, Parmenses et Cremonenses ceperunt castrum Plumatium
et combusserunt illud. Et eo anno in festivitate sancti
Christofori cepit venire nix magna; et usque ad illum diem fuerat
ita pulcrum tempus et yems fuerat ita calida, quod pulverulente
erant vie. Et eo anno fuit prima missa celebrata in ecclesia
Sancte Trinitatis de Campagnola a domino Ugolino cardinali,
qui erat Ordinis fratrum Minorum gubernator, protector et corrector,
et in Lombardia legationis fungebatur officio. Et obiit
Honorius, et eodem anno electus fuit in papam predictus dominus
Ugo cardinalis, et vocatus fuit Gregorius papa nonus, et fuit de
civitate Anagnie.
Iste Gregorius destruxit V volumina decretalium et inde fecit
unum volumen. Iste etiam longo tempore fuit in discordia et
pugnavit cum imperatore Friderico secundo, qui multa mala fecit
Ecclesie Dei, que eum nutrivit et coronavit, ita quod pene navis
Petri sub predicto papa cecidit in profundum. Hoc est quod
abbas Ioachym de Romanis pontificibus dixit, videlicet quod
«aliqui conabuntur in principes, aliqui ducent pacificos suos
dies». Nam Alexander tertius et Innocentius tertius et Gregorius
nonus et Innocentius quartus multa cum principibus rei publice
habuerunt litigia. Honorius vero tertius pacifice vixit, et Alexander
quartus, et Clemens quartus. Item patrimonium Beati Petri
fere <totum> a predicto imperatore Friderico fuit occupatum;
et per predictum imperatorem multi prelati tam in mari quam in
terra periclitati sunt, etiam cardinales.
Eodem anno Yspani recuperaverunt Emeritam metropolym
provincie Luscitanie et Pacensem civitatem et castrum Equina et
Clavigana in Algarbe, scilicet Elbas et Rumenia et Alcust. et
Serpam et Mauram et Corduben et Valentiam et regnum Maioricarum
et alias terras quam plures. Eodem anno etiam Ungaria
a Cúmanis et Tartaris valde destructa fuit.
Iste etiam papa excommunicavit Grecos, eo quod male sentiunt
de processu Spiritus Sancti et quia nolunt obedire capiti
quo, scilicet Romane Ecclesie. Et eodem anno, XVII Kal.
Augusti, beatus Franciscus in cathalogo sanctorum ascriptus et
canoniçatus fuit per supradictum papam. Ipse etiam canoniçavit
|
|