Intus in hanc foveam qui fugiendo ruit.
Hunc ad pretorem, peto vos, minate ligatum,
Quas meruit penas ut patiatur ibi.
Accusaturus ego sum capitaliter ipsum,
Hoc ausum, fracta pace, patrare scelus.
Mille talentorum quoque vobis infero penam,
Ni vinctum coram preside detis eum".
Territa non modicum tante formidine pene,
Fulconem coram preside turba trahit.
<Rusticus, Pretor, Fulco>
Pretoris Fulco cum sisteret ante tribunal,
Rusticus assurgens talia verba dedit:
"Sermonem, pretor, si nescio dicere comptum,
Ius non ledatur, deprecor, inde meum.
Casibus in multis lex parcit rusticitati,
Ignoscas igitur lege favente michi.
Ut reprobos homines refrenet condita lex est,
Quilibet ut valeat vivere iure suo.
Nocturnos fures violatoresque domorum
Quam graviter feriat lex sacra nosse potes.
|
|