ad capitulum generale non venirent nisi illi fratres quibus ex
regula incumbebat, cum sociis ydoneis et discretis; et fecit cassari
omnes obedientias missas laycis ab Helya. Et ipsemet papa
capitulo interfuit et audivit voces fratrum de depositione Helye
et de electione successoris, generalis ministri fratris Alberti Pisani.
Et in illo capitulo facta est maxima multitudo constitutionum
generalium, sed non erant ordinate; quas processu temporis ordinavit
frater Bonaventura generalis minister, et parum addidit
de suo, sed penitentias taxavit in aliquibus locis. Item, eodem
anno, post illud capitulum facta est gravissima solis eclipsis, ut
vidi oculis meis, de qua infra suo loco dicemus.
Item frater Helyas, cum adhuc minister generalis existeret,
videns quod universale capitulum Ordinis contra eum congregabatur,
misit dicendo per loca fratrum ut singulis diebus in capitulis
suis congregati fratres post Pretiosa alternatim intelligibiliter
legendo dicerent illum psalmum: Qui regis Israel, intende,
pro eo quod sub methafora vinee videtur facere de Ordine mentionem,
ibi: Vineam de Egypto transtulisti, eiecisti gentes et plantasti
eam. Dux itineris fuisti in conspectu eius et plantasti radices
eius, et implevit terram. Operuit montes umbra eius, et arbusta
eius cedros Dei. Extendit palmites suos usque ad mare, et usque
ad flumem propagines eius. Et breviter totus psalmus videtur ad
religionem beati Francisci et Ordinem pertinere. Et habet tot
versus, quot annis beatus Franciscus vixit in Ordine, scilicet
XX. Et quod ibi dicitur: Exterminavit eam aper de silva, et
singularis ferus depastus est eam, hoc absque dubio ad malum generalem
ministrum Ordinis cognoscitur pertinere, qualis fuit Helyas,
qui fuit destructor et exterminator et dissipator Ordinis fratrum
Minorum. Et nota quod nullus fuit malus generalis minister in
Ordine fratrum Minorum nisi ipse; et in hoc fuit deceptus, quia
credidit semper tenere dominium Ordinis, sicut facit papa Romanus
quamdiu vivit. Ille autem versiculus, qui in predicto psalmo
habetur, scilicet: Fiat manus tua super virum dextere tue et super
filium hominis, quem confirmasti tibi, ad bonum generalem refertur,
quales fuerunt omnes alii preter Helyam.
Diximus ergo diebus illis predictum psalmum ante generale
|
|