et anxietatibus, occasione subditorum et gregis nobis commissi,
nisi vos religiosi, qui familiariter estis Deo coniuncti, adiuvetis
nos cum cappis et caputiis vestris?».
Tunc volens confortare episcopum dixi sibi: «Sapiens in Prover.
dicit, XV: Cor gaudens exhilarat faciem, in merore animi
deicitur spiritus. Item Prover. XII: Meror in corde viri humiliabit
eum, et sermone bono letificabitur. Beatus Bernardus in expositione
Canticorum multa bona pro episcopis dicit, reprimendo
religiosorum temerarium iuditium contra eos. Dicit enim:
Fratres, revereamur episcopos, sed vereamur labores eorum. Si
labores pensamus, non affectamus honores. Agnoscamus impares vires
nostras, nec delectet molles et femineos humeros virorum supponere
sarcinis, nec observemus eos, sed honoremus. Inhumane nempe eorum
redarguis opera, quorum onera refugis. Temerarie obiurgat virum de
prelio revertentem mulier nens in domo. Dico enim: Si is qui de claustro
est eum qui versatur in populo interdum minus districte minusve circumspecte
sese agere deprehenderit, verbi gratia: in verbo, in cibo, in
somno, in risu, in ira, in iuditio, non ad iudicandum confestim prosiliat,
sed meminerit scriptum: Melior est iniquitas viri quam bene faciens
mulier. Nam tu quidem in tui custodia vigilans bene facis. Sed qui
iuvat multos, et melius facit et virilius. Quod si implere non sufficit
absque aliqua iniquitate, id est absque quadam inequalitate vite et conversationis
sue, memento quia caritas operit multitudinem peccatorum.
Hec dicta sunt contra geminam temptationem qua sepe viri
religiosi episcoporum vel ambire gloriam vel excessus temere iudicare
diabolicis instigationibus incitantur». Igitur, cum hec omnia
recitassem, dixit episcopus: «Retribuat vobis Dominus, frater
Salimbene, quia optime confortastis me. Revera, sicut dicit Ecclesiasticus
XXXII, vos estis vir consilii, qui non disperdet
intelligentiam».
Post istum missus fuit in Lombardiam alius legatus, quidam
cardinalis qui fuerat archiepiscopus Embronicensis, de quo, quia
superius dixi, hic tacendum videtur, hoc excepto, quia, cum
esset bonus cantor et bonus clericus, et placuisset sibi alleluia
beati Francisci, scilicet O patriarcha pauperum, voluit transformare
|
|