Benignitatis vestre rore complutus et exauditionis dominice mihi gratis
oblate gratia persuasus, inducor ut securus sacros hospitii vestri postes
introeam et vestre mansuetudinis aures petitorio pulsare presumam, sperans
ut me, quem precedentium obsequiorum exhibitio in exhaudiendo
non adiuvat, vestra benignitas sacra confoveat et domini mei Neapolitani
presulis in subsidium favoris accedat oblata pro me vobis intercessio litteralis.
Cum igitur, reverende pater et domine, inter desiderabilia mundi
huius affectem sub vestre protectionis alis vestrique favoris patrocinio
respirare dominationem vestram, quam votivis augeat Altissimus incrementis
et exaltet honoribus, humillima prece deposco, quatenus me, si
placet, in libro vestri favoris, quo soci plurimi iocundantur, stilo gratie
conscribentes, si dignus inveniar, sub vestre protectionis alis in vestrum
clericum admittatis.
|
|