Guido Faba: Dictamina rhetorica

100


CC.
Responsiva ad predictam.
Serenitatis ac magnificentie vestre negotia propria reputantes,
et amicos vestros diligimus et reputamus alios inimicos.
Quare vestra nobilitas recognoscat quod, quando vobis
placuerit, ad vestrum servitium cum multa fortitudine
veniemus.
CCI.
De comite ad comitem.
Clarissimo viro domino G. Dei gratia comiti Tuscie palatino,
quem fama laudis magnifice per mundum totum gubernat,
B. eadem gratia comes Rainerius de Manente salutem
cum desiderabili prosperitatis augmento. Respiciens creator
omnium de sancto habitaculo regni sui proditionem quam de
nostra persona fecerat dominus imperator, dignatus est me
noviter ab ipsius manibus misericorditer liberare: pro qua re
vestra excellentia glorietur, quia bonus amicus vester qui iam
mortuus putabatur ad propria est reversus.
CCII.
Responsiva ad predictam.
Gloria sit Deo in excelsis et exultatio magna hominibus
super terris, quoniam honoratissima vestra persona,
que inique capta fuerat et detenta, nunc a vinculis imperialibus
est soluta. De quo repleti sumus ineffabili gaudio,
affectantes non modicum solatio vestre presentie satiari.

Torna all'inizio