Rescriptum collegii cappellanorum domini Hugonis cardinalis remissum
Stephano concappellano, per dominum Johannem de Castro Celi tunc
electum Beneventanum.
Ad incarnationis divine misterium et ineffabile sacramentum venerandumque
nostre redemptionis commercium, memorandum assidue digneque
suscipiendum pro modulo fragilitatis humane, tua socialis dilectio e
camino fraterne caritatis erumpens nos sollicite invitavit. Isto non immerito
tempore, quo verbum eternum, de sinu Dei patris adveniens, a regalibus
sedibus nostrum publicum est ingressus, non mutando locum, sed
novum dignatione non tam mirabili quam stupenda producendo effectum.
In huius siquidem verbi copula stupet natura, usitata regula fallitur, subcumbit
ratio, vincitur intellectus, eternum nempe temporali coniungitur,
primum ultimo copulatur, suppremum connectitur ymo, altum infimo
coniugatur, fit extremum medium, creatura creator, servus dominus, et
factura totius conditor universi. O vis amoris immensa, inaniens et inebrians
quodammodo amatorem! O clementie pondus! O anchora caritatis
in celos inclinans et usque ad terram deponens, immo tandem ad inferos
omnium creatorem! O veneranda dignatio, ut ille qui celi non capitur
ambitu, per quem reges regnant et regna consistunt, parvo claudatur
|
|