abstineat reverenter, nisi mortis periculum immineret, sextam
feriam quamdiu vixerit ieiunando. Cum autem dictam penitentiam
non possit ut difficilem adimplere, nisi gratia divina
precedat et vestra misericordia subsequatur, fraternitatem vestram
rogamus, ut solo divino intuitu et amore sic ei dignemini
in temporalibus et spiritualibus providere, quod impositum
onus supportare valeat, et ad vomitum non redeat vel
peccatum.
CLXXXVI.
Littera ad subditos pro collecta.
Cum Parmensis ecclesia mater vestra de iure canonico
censeatur, eam tamquam devoti filii tenemini revereri, a qua
honores vestros recipitis et ecclesiastica sacramenta. Cum
itaque pro libertate vestra nuper ad curiam accedendo non
modicas expensas sustinuerimus et labores, vos, tamquam
membra suo capiti, nobis libenter debetis succurrere et nostra
onera supportare. Ideoque discretionem vestram, de qua bene
confidimus, deprecamur, ut caritativo affectu pro reverentia
Dei et Parmensis ecclesie vestra nobis auxilia porrigatis, imponentes
collectam inferius adnotatam per vestras ecclesias,
prout videritis expedire. Quod si quispiam subditorum ad hec
prestanda contumax fuerit vel rebellis, eos ad id servandum
auctoritate nostra per censuram ecclesiasticam compellatis,
vos nostre petitioni offerentes taliter in hac parte, quod devotionem
vestram possimus dignis in Domino laudibus
commendare.
CLXXXVII.
Littera pro commendatione nuntiorum.
Dominis et fratribus reverendis, talibus diocesis prelatis
et clericis, ad quos hec scriptura pervenerit Alatrinus, domini
|
|