Et fratres Minores de Parma fecerunt pulchrum refectorium.
Item eodem millesimo fratres Minores de Parma fecerunt pulcrum
refectorium in Prato Sancti Herculani, ubi habitant et ubi
antiquitus Parmenses nundinas faciebant et processu temporis
circa Carnisprivium cum armis ludendo pugnabant.
Et Parmenses fecerunt pontem lapideum in Galera.
Item supradicto millesimo Parmenses pontem fecerunt lapideum
super fluvium Parme in contrata que dicitur Galera a domo
Humiliatorum usque ad domum Predicatorum; et fecerunt fieri
murum civitatis versus montes iuxta fluvium Parme, prope hospitale
Sancti Francisci.
De operibus et edificiis civitatis Parme.
Item in precedentibus annis multa bona fecerant in civitate
sua Parmenses. Compleverant enim baptisterium in superiori
parte usque elevationem cacuminis; et iam diu fuisset completum,
nisi Ycilinus de Romano, qui Verone dominabatur, impedimentum
dedisset. Sulummodo enim de lapidibus Veronensibus
baptisterium illud fiebat. Item leones magnos fecerunt fieri et
columnas in maiori porta maioris ecclesie iuxta plateam baptisterii
et palatii episcopii. Item tres magnas vias, amplas et pulchras,
fecerunt: unam ab ecclesia Sancte Christine usque ad
Communis palatium; aliam a platea Nova, ubi concionatur a potestate,
usque ad ecclesiam Sancti Thome Apostoli; tertiam a platea
Communis usque ad ecclesiam Sancti Pauli. Et in omnibus
istis viis domos fecerunt et palatia pulcra hinc inde. Item fecerunt
palatium capitanei valde pulcrum prope palatium vetus,
quod factum fuerat sub Torello sive Taurello de Strata, Papiensi
cive et Parmensium potestate. Sub quo etiam inchoatum fuit
castrum Torelli in via que vadit ad Burgum Sancti Donini. Sed
|
|