Suscipe doctrinas et quas tibi do medicinas,
et quas pono minas me posuisse sinas.
Si prece sive minis non flecteris aut medicinis,
ecce tuus finis, preda, ruina, cinis.
Gens Regina, lege qua vivit Mutina lege,
te cum pace tege, te sine parte rege!
Hec aliena vide discrimina, scisma recide,
de te confide non trepidanda fide!
Protinus istarum rerum sit cura tuarum,
exemplum quarum non tibi credo parum.
Nota quod sensus istorum versuum habetur in verbis Salomonis,
Prover. XXIIII: Per agrum hominis pigri transivi et per
vineam viri stulti, et ecce totum repleverant urtice, operuerant superficiem
eius spine, et macheria lapidum destructa erat. Quod cum
vidissem, posui in corde meo et exemplo didici disciplinam. Item
superpositus sensus his versibus continetur:
Felix quem faciunt aliena pericula cautum,
et tua res agitur, paries cum proximus ardet.
Quod Guillielmus marchio Montis Ferrati maritavit filiam suam et dedit eam
filio Palialógi defuncti.
Item, millesimo supraposito, Guillielmus marchio Montis Ferrati
maritavit filiam suam et dedit eam filio Palialógi defuncti,
qui in Constantinopolitana urbe habet dominium super Grecos;
et dedit ei in dotem pro filia sua regnum Thessalonice, quod regnum
casale marchionum Montis Ferrati habuit a diebus antiquis,
scilicet tempore magni imperatoris Friderici primi, quando Manuhel
imperator Constantinopolitanus misit ad marchionem Montis
Ferrati ut mitteret ei unum de filiis suis, quia volebat ei dare
filiam suam uxorem. Et factum est ita. Et dedit ei Kyramariam
filiam suam et regnum Thessalonice. Et ex illo tempore factum
est regnum illud marchionum Montis Ferrati. Cum igitur marchio,
de quo dictum est supra, propter Grecorum dominium de
|
|