41

in galeis perrexerunt. et tantas eis pro honore reipublice mortuis laudes contulerunt quantas
nec alicui vivo unquam egerant, et planctum remanere iusserunt.
A.D. MCLXVIII, indictione XV. Imperator Fredericus Rainaldum cancellarium et
archiepiscopum Colonie Pisas direxit, quem Pisani octavo idus Martii honorifice receperunt,
et per VIII dies eum tenuerunt, qui in Pisanorum Parlamento fecit iurare quendam capellanum
Imperatoris felicem exercitum ab Imperatore faciendum in proxima estate versus Romam,
Puliam, Siciliam, et Calabriam, nisi iusto impedimento remanserit. Postea vero Pisanorum
Consules eius precepto exercitum in proxima ventura estate versus Puliam, Siciliam et
Calabriam facere iuravere, nisi per dominum Imperatorem et iam dictum cancellarium vel
archiepiscopum Maghentinum vel iusto impedimento remanserit. Preterea idem Consules
papam Pasqualem pro catholico tenere, et ei tanquam catholico obedire, et omnes clericos
Pisane urbis idem facere iurare, et archiepiscopum Vilianum non recipere, nisi iamdicto
pape obedire voluerit, et archiepiscopum eligere XII kal. Aprelis, ac domino Pasquali consecrari
venturo proximo die Iovis Sancto et Rolando, qui papa Alexander vocatur, non
obedire, nec eum pro papa catholico tenere, sacrosanctis evangeliis tactis, firmiter promisere.
Archiepiscopus vero Villanus voluntati Imperatoris et pape Pasqualis minime acquievit, immo
penitus facere recusavit.
A.D. MCLXVIII. Pisanorum Consules, preceptis Imperatoris et pape Pasqualis obedientes,
Benencasam canonicum Sancte Marie Maioris ecclesie in archiepiscopum honorifice,
VIII kal. Aprilis, elegerunt: qui ad predictum antistitem cum duobus Consulibus, scilicet
Benetto et Guidone Galli et sapientibus clericis et laicis honorifice perrexit, quem venerabilis
Pasqualis cum Cancellario et cardinalibus gloriose recepit, eidemque Sabbato Sancto sacerdotii
dignitatem donavit, et die lune proximiori, post Pasca, in archiepiscopum consecravit:
et sic Pisas cum magno honore X kal. Iunii reversus est.