Guido de Columnis: Historia destructionis Troiae

Pag 103


morte crudeliter uitam soluunt. Sicque a Grecis ipsis castri ipsius
toto ambitu intercepto, in predictum castrum irruunt, ipsum in
magna potencia debellantes. Troyani uero, ordinatis bellis eorum
in summitate murorum, aduersus Grecos duram et diram defensionem
opponunt, nunc eos iactis lapidibus obruunt, nunc eos interimunt
in uibramine lancearum, nunc ipsos iaculis acutis afficiunt,
nunc balistarum crebris emissis sagittis ipsos letaliter uulnerant et
extreme morti tradunt. Greci uero, diuersorum generum machinis
ordinatis ac diuersis arietibus institutis in diuersis locis, quam
pluribus bellicis scalis appositis, letaliter impetunt dura debellacione
Troyanos. In quorum debellacione multi ex Grecis sternuntur
a scalis, et uolubiliter ruinosi peruenientes in terram, fractis ceruicibus,
uitam exalant. Greci uero passim intereunt. Sed demum
Troyani, multo labore lassati, se quasi languida et effeminata defensione
tuentur. Ad quod Greci intollerabili copia pugnatorum
glomerose insistencium contra Troyanos per scalas ipsas castrum
ascendunt, alii per fenestras, alii per murorum liberas summitates
et eorum per muros uexillis appositis, in recompensacione suorum
interfectorum ab eis, quotquot ex ipsis inueniunt aut gladio perimunt
aut ruina. Nemini parcunt et, etatis discrecione non habita,
vniuersos mucrone truncatos occidunt. Et dum nullus Troyanorum
viueret inter eos, Greci latibula castri scrutantur, quicquid inueniunt
utile rapaci preda subripiunt et asportant, et omnibus locis de rerum
ablatione penitus uacuatis, demum castrum ipsum euertere
decreuerunt. Prostratisque meniis altis ipsius, totum scinditur ex
ruina, murisque solutis et in facie terre deiectis tam deiciencium
studio quam ignium flammis uoracibus submissorum, altum Thenedon
ymum tenet. Et sic, uastatis omnibus et arreptis, Greci uictores
cum preda maxima eorum reuertuntur ad naues.
[Incipit liber xiius de Grecis mittentibus ad Priamum
pro restitutione Helene et dampnorum factorum per Paridem. ]
Greci itaque, de predictis duobus castris et eorum incolis absoluta
obtenta uictoria, dum in portu Thenedon et eius planicie uitam ducerent

Torna all'inizio