consolationis informare remedia cum quadam animi gratificatione porrigimus,
quod totum regnum Sicilie vobis humiliter parere desiderans et sub vestris
iussionibus vivere, promptissima devotione disponunt, ita quod nobiles
omnes et terre ac civitates famose precipue, in vobis et heredibus vestris
fidelitatis et homagii iuramenta tamquam eorum domino libentibus animis
prestiterunt et nobis pro parte vestra unanimiter obediunt et intendunt.
Vos igitur, felicissime domine, ad subditorum vestrorum statum
pacificum observandum nobilibus et civitatibus regni vestri, quos interclusa
presentibus cedula continet, speciales litteras vestras dirigi iubeatis, per
quas significetis eisdem, quod ex insinuatione nostra ipsorum fide et devotione
plenius intellecta parati estis observare tenaciter, que pater noster in
testamento suo constituit observanda et gratiam ac benivolentiam vestram
ad eos favorabiliter extendetis, et quicquid in vestri absentia contigerit nos
gerere, vice vestra, rata et firma tenebitis et servari inviolabiliter facietis.
Nichilominus civitatibus et nobilibus regni Ierosolimitani litteras vestras
exhortatorias destinari mandetis, ut eos, qui nunc umbram vestri dominii
subire desiderant et vestris iussionibus obsecundant ad vestra servitia, pulchra
spes animet et benivolentie future presagium libenter inducat. Post
hoc tamen ad memoriam vestram reducimus, ut, si negotiorum et temporis
qualitas vel habilitas suggeret, quod de adventu vestro, qui ab omnibus
tam libenter quam ylariter expectatur, regnicolarum vestrorum fidelium
animos recreare possitis, quod exinde honori vestro magis expediat, regalis
provideat celsitudo. Nobis verumtamen, qui prosperum adventum vestrum
inter viventes alios desideranter appetimus, mandare dignemini, quid per
nos fieri serenitas vestra velit, ut vestre magnitudinis cognita voluntate
super omnibus iuxta vestrum beneplacitum procedamus.
|
|