Dominus … papa … priori Lateranensi, per Stephanum.
Ad salutis merenda premia fideles Christi libenter inducimus et eos ad
acceptabile Domino, semetipsos, obsequium exhibendum gratiosis et
oportunis suffragiis invitamus. Sane, prout nuper accepimus, cum in
Urbe multi, utriusque sexus, mares et mulieres instinctu pro tempore
solaminis inspirati, vivifice crucis suscepto signaculo, suas Terre Sancte
devoveant voluntates, dum nos interdum exinde abesse contingit, nec
ibidem alius reperitur qui crucesignatis in eiusdem Terre Sancte subsidium
profecturis concessas indulgentias administret; indulgentiarum
huiusmodi assecutione cessante, fervor eorum et salutare propositum
refrigescit, in eiusdem Terre non modicum detrimentum. Volentes igitur
super hiis prefate Terre dispendiis tam oportuno quam debito remedio
providere, quo se memorate Terre voventibus, ut ardentius emissa vota
percompleant, satisfiat, discretioni tue, de qua plenam in Domino fiduciam
obtinemus, crucesignatis et crucesignandis omnibus de Urbe predicta,
ibidem, in apostolice sedis absentia, privilegia, libertates omnes et
indulgentias concedendi, que crucesignatis in dicte Terre Sancte subsidium
in generali concilio sunt concessa, liberam damus atque concedimus
auctoritate presentium facultatem.
|
|