Pag 40

dominus Ardicio da Rivoltella et dominus Otto da
Brixia, Laude venerunt. Ad quorum pedes Laudenses
prostrati, quatenus Mediolanenses rogarent, ne propter tam
nefariam ac detestabilem rem ad periurium perpetrandum
non cogerent, valde eos deprecati fuere; recitantes itaque
eis causam, quam Mediolanenses ipsis petebant, et eam etiam,
quam ipsi videlicet facere volebant, ac rationem, per quam
quod illi ab eis exigebant facere eis recusabant. Cardinales
utrique misericordia commoti — ea, que audierunt Mediolanenses
Laudensibus exigere, valde eis displicuerunt, ac ea,
que Laudenses Mediolanensibus velle facere audierunt, bene
eis complacuerunt —, habentes etiam pro nihilo et in maximo
detrimento reputantes, quod tam inique tam indecenter
Mediolanenses erga Laudenses se habebant, quod Laudenses
ad tam iniquum periurium cogere publice conabantur; promiserunt
namque eis, quod statim ut Mediolanum pergerent
ex toto corde eos rogarent et, si precibus obtemperare noluerint,
quod ex parte Dei et domini pape eis iuberent, quatenus
ad hoc iniquum periurium eos nullatenus compellerent,
sed, si velint illud sacramentum recipere, quod Laudenses