PRAEFATIO PETRI MALLII IN OPUSCULUM
HISTORIAE SACRAE AD BEATISSIMUM PATREM
ALEXANDRUM III PONT. MAX.
SANCTAE ET APOSTOLICAE SEDIS ALEXANDRO, DEI GRATIA SUMMO
PONTIFICI ET UNIVERSALI PAPAE, PETRUS MALLII, SOLA DEI PIETATE
BEATI PETRI BASILICAE PRESBITER QUALISCUNQUE, LIBELLUM EX ARCHIVO
EIUSDEM SACROSANCTAE BASILICAE COMPILATUM.
Licet haec quae sequuntur in sanctorum Libro Pontificum et
in eorum quoque sepulchris plenissime scripta reperiantur, quia
tamen dominis et fratribus meis idoneum et utile visum est, haec
me breviter in unum colligere, ut ad quorumlibet notitiam facilius
pervenirent, quod fraterna mihi charitas imperavit, fideliter adimplere
proposui. Non quod ingenii vires mihi suppeterent, sed
quia me ad hoc illa virtus obedientiae provocaret, quae, sicut venerando
Samuelis testimonio dicitur, holocaustis et victimis antefertur.
Et quidem saepe corporis in me perpendens invalitudinem,
et scientiae considerans parvitatem, diu diffidendo factus sum ut
homo non audiens, dum me ad hoc opus sufficere non viderem.
Sed quia, teste Apostolo, dilectio proximi plenitudo est legis,
fraternae dilectionis auctoritate compulsus, percepi confidentiam
iniunctorum; ne occasione meae invalitudinis arbitrium propriae
sequerer voluntatis, et ita cum apostata angelo et vetere homine, non
Christi, sed proprio placendo sensui, [locum] sortitus essem, factusque
ut membrum corporis absque capite, lucis ac vitae participatione
carerem. Quoniam igitur Deus dissipat ossa hominum sibi
placentium, duxi non in hoc mihi, sed charitati, quae Deus est, potius
|
|