LXXII.
Responsiva ad eamdem.
Petrus iudex potestatis Tarvisine dilectissime uxori sue
G. salutem cum indissolubili amoris vinculo. Statim cum ad
nos vestre littere pervenerunt, una cum potestate Albertum compulimus
iuramentum prestare, quod a ludis et taberni, et aliis
inhonestis et illicitis abstineret; et sic de feudo suo de cetero
eidem dabitur moderate, quod de residuo aliquam subventionem
habere poterit indigentia parternalis.
LXXIII.
De viro ad mulierem ante factum.
Nobili et sapienti domine B. Forlivii morum elegantia
decorate, A. salutem et quicquid fidelitatis et servitii potest.
Sic me cepit vestre claritatis amor, virgo splendida, rosea et
serena, quod diebus ac noctibus non possum aliud nisi de
vestra pulcritudine cogitare; quam cum videre valeo, in
tantum meus animus gloriatur, quasi essem intra paradisi
gaudiis constitutus. Cum autem sitis spes mea que mihi sola
potestis in terris conferre letitiam et salutem, gratiam suam
mihi pereunti vestra curialitas misericorditer largiatur, sine
qua mea mors vita creditur et vita mortua reputatur.
LXXIV.
Responsiva grata.
In celis delinquerem et peccarem graviter super terris, si
tue desiderabili voluntati spem iucunditatis auferrem et denegarem
gratiam virginalem. Ideoque noscat tua curialitas
commendata, quod intra castrum pudoris nostri tuus assidue
viget amor; cui, si loci et temporis qualitas non obessent,
grata responderent solatia floride iuventutis.
|
|