fuit. Hic siquidem intra pueriles annos mira et magnifica coepit agere, voluptatis
libitum moderationis freno restringere, corpus ieiunii edomare, spiritu
prophetiae aliquando pollere, orationis assidue laboribus insudare. Cumque
iam adolescentiae tempus sub huiusmodi conversationis studio transegisset,
et iam illud immineret quo iuvenilis aetas carnali solet implicari
connubio, pater suus licet invitum, secundum saeculi dignitatem, uxoris
eum copulavit coniugio. Quid dicam, quid referam? Dolori et maestitiae
servi Dei compati et consulere volo, sed anxietatem et maerorem cordis
eius retexere penitus ignoro. Quid ageret servus Dei? Quid ageret?
Anxius, trepidus excogitare diu coepit in animo, qualiter se dissolveret ab
uxoris coniugio. Si illam teneret corporis integritatem violare timebat;
si eam dimitteret, infamis in patria turpiter vivere perhorrebat.
|
|