In qua quidem causa litis contestacione facta legittime,
ac iuramento calumpnie et de veritate dicenda prestito
sollempniter ab utroque, factisque hinc inde positionibus,
et ad eas responsionibus subsecutis, receptis etiam probacionibus
omnibus quas ipse partes hinc inde facere voluerunt,
dei nomine invocato, contra dictum R iuste ut credo,
servato iuris ordine, diffinitivam sententiam promulgavi.
A qua dictus R ad vestre sanctitatis sedem appellavit
in scriptis, petens instanter apostolos sibi dari.
Cui appellacioni ob reverenciam sedis apostolice detuli
reverenter, et prefatum R ab examine meo dimittens ipsum
ad pedes sanctitatis vestre transmitto cum presentibus
apostolis seu dimissoriis litteris, sigilli mei munimine roboratis,
prefixo sibi termino peremptorio duorum mensium
a die appellacionis interposite conputando, infra quem per
se vel procuratorem ydoneum ad causam ipsam sufficienter
instructum cum omnibus instrumentis actis et munimentis
suis vestro se conspectui representet, prosecuturus causam
appellacionis huiusmodi ut fuerit ordo iuris.
Datum etc.
c. Forma apostolorum cum appellatur a gravamine
per iudicem delegatum illato.
Sanctissimo in Christo patri domino M sacrosancte romane
ecclesie summo pontifici etc.
Olim sancte memorie ( vel felicis recordacionis) dominus
Nycolaus papa iii, predecessor vester, causam quam P de
tali loco movet seu movere intendit R super . . re mihi
sub hac forma conmisit: Nycolaus etc.
In qua quidem causa cum domino R super tali re peremptorium
terminum ad proponendum omnes excepciones
dilatorias et declinatorias assignassem, ipse R in termino
sibi dato quasdam excepciones presentibus interclusas
proposuit. quas cum frivolas reputarem, eas habito consilio
peritorum plurium non admisi.
Propter quod idem R appellavit ad sedem apostolicam
sub hac forma: coram vobis venerando viro domino G etc.
|
|