in nube non lateat, credimus, ut non improperando sed suaviter rememorando
loquamur, quod, per nostre ac progenitorum ipsorum sincere
dilectionis et caritatis affectum, vestre religionis ordo continua incrementa
suscepit, dum nos et ipsos confratres vestri, religionis eiusdem cultores,
pro nostro et ipsorum posse, ad provectum et commodum ordinis vestri
predicti invenere semper pios, propitios, favorabiles et benignos. Et quamquam
sit affectibus nostris gratum, et zeli fervor ad id sua virtute nos excitet
a cultu devotionis huius non recedere nec tepere, sed uberiora potius ad
productionem fructuum placidorum exhibere liberaliter nutrimenta, non
tamen possumus, si secundum carnem vivitur, non moveri, cum ab hiis
odium pro dilectione recipimus et maledictionem pro benedictionibus
sustinemus, quos semper caritative tractare studuimus, et eorum sategimus
pro viribus comoda procurare. Sane ut ad littere compendia redeamus,
discretionem vestram volumus non latere, quod hiis diebus frater … de
ordine vestro, prior de …, qua occasione nescimus, in plures de gente
nostra Vasconie turbationis virus effundens, commovit populum et multos
fecit suo errore devio a rectitudine nostre fidei deviare, multaque in terra
nostra scandala et in agro pacis zizania, quod cum dolore cordis referimus,
seminavit, et quicquid malignitatis potuit in honoris nostri detrimentum
non est veritus, per iniquitatis exercitium, operari, sicut vobis veridice
referre poterit … archiepiscopus, cui super hoc indubitatam fidem adhibere
velitis, oraculo vive vocis. Consideret igitur vestre caritatis integritas
si religionis sancte cultores debitum divine servitutis exerceant, dum illis
dissidiis incaute se implicant, ex quibus odia, lites et iurgia multa proveniunt
et animarum multiplicia detrimenta nascuntur, et si Patris almi
dominici sectatores dominica mandata reverenter adimpleant, dum pacem
suffocant inter spinas et a subditis crimen lese maiestatis committi procurant
in dominos, qui predicare deberent tantummodo verbum Dei ac Illius
correctionis penam. In predictum priorem exercere velitis, iuxta vestri
ordinis disciplinam, quod pena eius, in metus multorum transiens, a perpetratione
similium coherceat auditores, et ex opere pateat quantum eiusdem
prioris incauta presumptio vestris sensibus sit infesta, nosve proinde
fortius animemur in devotionis antique fervore, quam habemus ad predictum
vestrum ordinem remanere.
|
|