Quintana porta appellatur in castris post praetorium, ubi
rerum utensilium forum sit.
Querqueram frigidam cum tremore a Graeco karkara certum
est dici, unde et carcer. Lucilius (1194): “Iactans
me ut febris querquera.” Et alibi (1277): “Querquera consequitur
capitisque dolores.” Item Plautus (frag. 79): “Is
mihi erat bilis querqueratus.”
Quercus dicitur, quod id genus arboris grave sit ac durum,
tum etiam in ingentem evadat amplitudinem. Querqueram
enim gravem et magnam quidam putant dici.
Quadruplatores dicebantur, qui eo quaestu se tuebantur,
ut eas res persequerentur, quarum ex legibus quadrupli
erat actio.
|
|