Guido de Columnis: Historia destructionis Troiae

Pag 143


Sed deinde uidens Grecos inualescere contra Troyanos ad
propriam aciem suam rediit et se coniunxit eidem. Gaudent ergo
Troyani qui erant in predicta acie constituti suum recuperasse
dominum et ductorem. Et sic Hector ipsos sermonibus affectuosis
alloquitur, reducens eis ad memoriam preteritas iniurias eis a Grecis
illatas, et eorum reducit ad mentem quid Greci eis facerent si eorum
(quod absit!) essent forte uictores. Monet ergo eos et ortatur eosdem
ut in bello fortiter inualescant et ad uictoriam toto corde prorsus
anhelent. Tunc omnibus ei in deuota uoluntate fauentibus, Hector
ex parte dextera eos per quandam uallem contra Grecos duxit ad
bellum. Illic fit cedes maxima, multi ex Grecis intereunt. Nam et
Hector eos sine fine confundit.
Rex uero Thoas, qui Cassibilans, filium regis Priami, occiderat,
discurrendo per acies contra Troyanos multa committit dispendia.
Quem naturales filii regis Priami certissime cognoscentes in vindictam
mortis fratris eorum omnes vnanimiter conuenerunt. Et sic
omnes vnanimiter in regem Thoas irruunt, ipsum ab equo deiciunt.
Qui, fracto sibi ense, ab eis non poterat se tueri, et sui cassidis
ruptis laqueis et eis ab eo uiriliter extirpatis, caput eius inerme
sibi intercidere omnes intendunt. Quod de facili potuissent nisi
Athenarum dux irruisset acriter super eos et Quintilienum, qui
regem Thoas durius opprimebat, grauiter uulneratum ab equo deiecit.
Deinde dum contra alium potenter insisteret, Paris cum quadam
sagitta, tenso arcu, percussit ipsum in costis. Sed Athenarum
dux de hiis nichil curans sua potencia et uirtute regem Thoas, in
locis tamen pluribus uulneratum, ab eorum manibus liberauit. Et
ipse dux in multorum adiutorio qui sibi uiriliter succurrerunt ab
eorum manibus liber euasit.
Hector autem dum in deuiccionem Grecorum cum suis firmiter
anhelaret, rex Humerus ex parte Grecorum, tenso arcu et emissa
sagitta, Hectorem in facie uulnerauit. Contra quem Hector statim
irruit, et nudato ense sic grauiter ipsum percussit in capite quod caput
eius duas diuisit in partes. Quare mortuus rex Humerus nec amplius
tendet arcum nec sagittam emittet. Greci uero in sonitu
cuiusdam cornu vii milia pugnatorum contra Hectorem faciunt conuenire,
qui cum suis mirabiliter se defendit. Interim uero Hector a

Torna all'inizio