societatem, immo verius Ihesu Christi, benigno favore
laudantes, universitatem vestram rogamus in Domino et monemus,
ut tante pietatis et misericordie operibus intendentes,
inducatis etiam alios ad intrandum, ut vestra caritas non
frigescat, sed per dilectionis amplitudinem extendatur. Nos
vero de misericordia Ihesu Christi et sanctorum meritis confidentes,
vobis omnibus qui estis in societate predicta et illis
qui pro remissione peccatorum suorum intraverint in eamdem,
unum annum pro criminalibus et quartam partem venialium
in Domino condonamus.
CLXXXV.
Littera pro penitente.
Universis hanc paginam inspecturis talis episcopus in vero
salutari salutem. Super conversione peccatoris Dei filium
collaudemus, in terris cum omnibus gloriantes, quia gaudium
est angelis in excelsis: nam ovis que perierat est inventa.
P. lator presentium qui mortuus fuerat per peccatum per satisfactionem
congruam resurrexit. Nam, inspirante Domino
devotus ad lamenta penitentie nunc recurrens, nostri prepositi
pedibus advolutus, cum multa contritione cordis lacrimabiliter
est confessus se, diabolo instigante, multa crimina commisisse;
pro quibus, mensura canonum mitigata, recepit XXX annorum
penitentiam in hunc modum: ut quadragesimam maiorem
et Sancti Martini debeat ieiunare, et secundam, quartam et
sextam feriam earumdem, et vigilias apostolorum et Sancte
Marie et Sancti Laurentii cum ieiuniis quatuor temporum in
pane et aqua. In quadragesima vero Pentecostes quartam et
sextam ferias ieiunet, et infra spatium huius penitentie faciat
tres carinas; limina quoque Santi Iacobi apostoli visitare teneatur
sine propria pecunia cum cilicio et baculo cubitali; a mane
usque ad tertiam non loquatur sine licentia prelatorum, nec
ullam intret ecclesiam nisi sanctorum ibidem corpora requiescant;
a corpore et sanguine Christi usque ad dictum tempus
|
|