litiganti exhibere; ita quod de vestris litteris quas nobis attulit
potest non immerito gratulari, et pro his semper vobis semper
remanet obligatus ad gratiarum exsolvendas uberes actiones.
LVII.
De iudice ad iudicem super receptione testium.
Cum in nostri presentia causa quedam inter A. et B. cives
Bononie ventiletur, et circa examinationem ipsius intenderemus
debita sollicitudine diligenter, ut in libra rationis sedentes cognita
veritate pronunciare possimus iudicium equitatis, idem
B. proposuit et firmavit, quod ad suam intentionem probandam
testes de vestro districtu producere intendebat.
Quocirca vestram prudentiam insinuatione presentium exoramus,
quatenus testes quos dictus B. vobis duxerit nominandos
amore nostro cogere velitis ferre testimonium veritatis, eisdem
interrogationes fieri facientes, secundum quod forma negotii postulat
et interclusa ceduta manifestat; quorum dicta nobis per
eumdem mittatis qui vobis nostras apportabit litteras, tam
manu publica quam vestri sigilli munimine insignita, ut ad
similia pariter et maiora vestre dilectioni teneamur omni
tempore obligati.
LVIII.
Responsiva ad predictam.
Postquam vestrarum seriem vidimus litterarum, continuo
testes, quos B. vester civis inducere voluit, recipi fecimus coram
nobis et examinari per nostrum notarium diligenter; quorum
depositiones vestre prudentie mittimus sigillo proprio et subscriptione
publica communitas, in his et aliis cupientes vestre
dilectioni servire et modis omnibus complacere.
|
|