Guido Faba: Epistole

380


XLII.
Sententia lata a iudice delegato.
In nomine patris et filii et spiritus sancti amen. Ego B.
prior Sancti Iohannis de Monte civitatis Bononie, iudex delegatus
a summo pontifice in hac forma « Gregorius episcopus
servus servorum Dei et cet.
» auctoritate ipsius de causa cognoscens,
que inter A. et M. vertitur prelibatos, secundum
libellos ab eisdem exhibitos in hunc modum « Vobis domino
tali iudici delegato ego A. conqueror de M. et cet.
» et « Vobis
domino tali iudici delegato ego M. reconveniendo A.
conqueror de eodem et cet.
» lite super hoc a partibus contestata,
et de calumnia prestito iuramento, positionibus seu
interrogationibus ac responsionibus factis, confessionibus receptis
et testibus hinc inde productis et publicatis, et auditis
que viri sapientes circa testium depositiones et acta iudicii
dicere voluerunt, deliberatione habita diligenti et communicato
consilio plurium sapientum, diffiniendo pronuntio et pronuntiando
absolvo M. a petitione A. superius nominati.
XLIII.
Appellatio facta a sententia delegati.
Quia vos, domine B. prior Sancti Iohannis de Monte Bononie,
iudex a summo pontefice delegate, in causa quam habeo
cum Martino contra me inique tulistis diffinitivam sententiam
pro eodem, tam ab ipsa quam ab omni gravamine mihi facto
appello ad sedem apostolicam viva voce, que velut mater
sanctitatis pie sublevat onera gravatorum, et apostolos peto
et iterum peto et instanter peto, sicut postulat ordo iuris.

Torna all'inizio