Pag 293

uobis thesaurum, quem habemus in Cadram, Susim, Batram, quem
parentes nostri thesaurizantes sub terrenis latibulis seruauerunt
etc.
Littera Darii ad Alexandrum
67. Venientes ipsi missi Darii ad Alexandrum sibi epistulam
obtulerunt, quam mox iussit Alexander coram omnibus aperire.
Audientes tenorem epistule gauisi sunt ualde. Tunc unus ex
principibus milicie, nomine Parmenio, dixit Alexandro: "Maxime
imperator! Tolle tibi omnes diuicias, quas tibi Darius sponspondit,
et redde sibi matrem et filios et uxorem!" Audiens hoc Alexander
uocauit ad se missos Darii et coram omnibus dixit eis:
"Dicite imperatori uestro: Miramur, siquidem se premio matrem
suam et filios et uxorem de nostris credit manibus extorquere.
Si uictus est, nobis premium non promittat, sed subiciat se iugo
nostro et omnes dignitates ac diuicias suas nostro culmini exponat.
Si uictus non est Darius, iterum nobiscum pugnam committat."
Et hec dicens dedit eis dona optima et dimisit eos. Deinde
precepit Alexander militibus suis, ut colligerent corpora mortuorum
ipsaque reconderent in sepulchris. Vulneratis
uero iussit conferre medicinas etc.
Quomodo Alexander castrametatus fuit iuxta fluuium Cancrum
68. Deinde amoto exercitu castrametatus est iuxta fluuium
Cancrum ibique diis suis uictimas immolauit. Erant quippe circa
ipsum fluuium palacia pulcherrima summis artibus eleuata, que
construxerat Xerses, rex Persarum. Que uidens Alexander precepit
illa incendi. Et post paululum penitencia ductus precepit nullomodo
comburere. Erat enim in ipso loco ager maximus, ubi
antiqui reges et Persarum iudices mortui condebantur. In quo
agro fodientes Macedones in sepulcris uasa aurea et argentea
comperebant. Inueneruntque ibi sepulchrum Nini, regis Assiriorum
et Persarum, ex uno lapide amatisto cauato, habens forinsecus
sculptas palmulas et aues ex omni genere factas. Et tam lucidus
erat ille amatistus, ut et foris integrum corpus hominis apparebat.
Erat quoque in ipso loco turris angusta et pessima, in
qua multi homines consistebant, habentes alii demanicatas manus,
alii tybias, alii pedes, alii oculos. Hii audientes strepitum armatorum
clamauerunt omnes unanimiter ad Alexandrum dicentes:
"Succurrite nobis miseris, maxime imperator!" Audiens Alexander
clamorem illorum iussit eos de turri trahi et uidens eos
miseria motus condoluit pariterque plorauit. Et precepit illis dari
per unumquemque auri dragmas decem milia et promisit proprietates
suas integras restaurari. Hos enim includat in cancere
Darius, eo quod nobilissima prole creati fuerant; et uniuersas
possessiones eorum erogauerat seruis suis etc.