quorumque iudiciis et censuris vita regulata cuiuslibet morum proficeret
disciplinis. Sicque statuit duo luminaria supra terram, maius scilicet
atque minus, ut in ipsis universalis humane compaginis consisteret
fundamentum. In quibus pontificalis auctoritas et regalis potentia designantur:
una videlicet qua spiritualia, et alia qua corporalia regerentur.
Ad subsistentiam itaque machine spiritualis, utpote dignioris, beatum
Petrum apostolorum principem, et in ipso pontifices successores, qui potestatis
ligandi atque solvendi plenitudinem obtinerent, Summus Pontifex
in eternum unigenitus Dei filius Iesus Christus, qui humano generi doctrinam
tribuit salutarem, magistros esse voluit et pastores, alios sub ipsis
antistites pia miseratione constituens, qui ad instar apostolorum eius, per
universa mundi climata in partem sollicitudinis evocati, singuli singulis
decretis sibi provinciis per exacte cooperationis ministerium presiderent
ad corporalis vero compaginis firmamentum, cuius facilis est profecto
disiunctio. Reges, principes et seculares potestates, Rex regum et Dominus
dominantium idem ipse preesse voluit Iesus Christus, ut illi quidem
in executione pontificalis officii spiritualibus vacando negotiis proficerent
ad salutem, et hii salubriter in excellentia regie dignitatis et mundane
potestatis officium corporalia gubernando rei publice gerenda negotia perversorum
repressis maliciis adaugerent, et sic machina fieret utriusque figmenti
stabilior, dum haberet quodlibet proprium servatorem. Ad huius
autem stabilimenti fructum desiderabilem capescendum, tunc profecto
facilius devenitur, cum et summus rector spiritualium et corporalium presides,
ille zelo paterne dilectionis ad istos, et isti fervore filialis devotionis
ad illum in executione suscepti regiminis per mutue cooperationis participium
coniunguntur; tunc etiam sumit gustati fructus huius perventio
incrementum, cum et hii, qui sub eodem rectore in partem sollicitudinis
presidere noscuntur, regionum conditiones, subditorum mores et alia, quibus
cura presidentis instruitur, per experientie longe studium non ignorant,
ut sciant singulis viam monstrare salutis, et valeant pro qualitate personarum
et temporum prebere subditis antidota sanitatum. Ex horum
siquidem consideratione inducimur et monemur, ut, pro tranquillitate et
|
|