longitudo sive plenitudo sillabarum membri alterius adequare,
(7) hoc modo: 'Virgo Maria pro fidelibus intercedit; regina
mundi supplicantium preces audit; stella maris emicans ad
patriam nos perducit'. (8) Et color iste vocatur rithmon.
17. (1) SIMILITER CADENS.
(2) Similiter cadens dicitur cum due vel plures casuales dictiones
eisdem casibus similiter efferuntur, (3) ut: 'Hominem
laudas egentem virtutis, habundantem felicitatis'. Item: 'Hic
diligentia comparat divitias, negligentia corrumpit animum'. (4)
Et dicitur iste color homoeptoton.
18. (1) SIMILITER DESINENS.
(2) Similiter desinens est dictionum casu carentium consimilis
terminatio, (3) ut si dicam: 'Turpiter audes facere, nequiter
studes dicere'. Item: 'Vivis invidiose, delinquis studiose, loqueris
odiose'. (4) Possunt et simul concurrere hi colores, hoc modo:
'Perditissima ratio est amorem petere, pudorem fugere, diligere
fortunam, negligere famam'. (5) Iste color nominatur
omoeteleuton.