palatia sibi edificant». Item Bernardus: «Res ecclesiarum
res pauperum sunt. Sacrilega crudelitate subripiunt, quicquid non
domini, sed dispensatores preter necessarium victum et simplicem
vestitum suscipiunt». Item Bernardus: «Plus fulgent calcaria
quam altaria, citius inveniuntur in stabulo quam in templo,
citius currunt ad coquinam quam ad ecclesiam, ad mensam quam
ad missam». Item Bernardus: «Deus se hominibus subdidit, et
tu, dominare gestiens hominibus, tuo te preponis auctori». Item
idem: «Quotiens hominibus preesse desidero, totiens Deum meum
preire contendo». Item idem: «Qui primatum desiderat in terris,
confusionem accipiet in celis». Inde etiam commendatur vere
martyr, de quo dicitur quod minas iudicum non timuit nec terrene
dignitatis gloriam quesivit. Item Gregorius: «Mirabile est
cecum cecis in ducatum suscipere, et mirabilius tales cuilibet
scienter committere». Item Bernardus: «Monstruosa res est gradus
summus, animus infimus; sedes prima, vita ima; lingua
magniloqua, manus ociosa; vultus gravis, actus levis; sermo
multus, fructus nullus; ingens auctoritas, nutans stabilitas».
Item Gregorius: «Turpe nimis est ibi nos negligendo cadere, unde
predicando conati sumus alios levare». Item Cassiodorus: «Nichil
me docere potest, in quo nichil invenio imitandum». Item Gregorius:
«Timere debet qui vult aliis predicare, ne proprio iaculo
se ipsum percutiat, cum predicatio sine opere contemnatur».
Nota quod plures rationes assignantur quare Deus Iudam ad
apostolatum elegit, quem sciebat in bono non perseveraturum,
quarum V et ultima est ut non presumamus, si ad dignitates eligimur.
Unde Bernardus in epistola ad Coloniensem archiepiscopum:
«Si tantum qui eliguntur ad ministerium constat eligi ad
regnum, securus est talis archiepiscopus. Quod si Iudam in sacerdotio
et Saulem in regno non legitur reprobasse nisi Deus, timeat
necesse est taliter archiepiscopus». Unde valde terribile est illud
Mat. XXII: Multi sunt vocati, pauci vero electi. Item ad Ro.
XI: Noli altum sapere, sed time. Item Bernardus, loquens ambitioso:
«Age miser, sequere ducem tuum, multiplica prebendas,
accelera ad archiepiscopatum, ad episcopatum aspira. Paulatim
ascendis, sed non paulatim descendes. Videbam, inquit, Sathan
|
|