Pag 32

Cum predicta tam in Lombardia quam in Marchia gererentur, interfecto a Frisionibus in
bello rege Alemanie Gulielmo, convenerunt principes ad electionem more solito faciendam.
Cum igitur tractarent de principe idoneo eligendo, humani generis inimicus seminavit zizaniam
inter eos. Nam quidam comitem Ricardum, fratrem regis Anglie in regem Alemanie
elegerunt; alii vero sua vota in regem Castelle penitus transtulerunt. Comes autem Ricardus
ascendit in Alemaniam festinanter, et de assensu quorundam principum capiti suo imposuit
regni Alemanie diadema. Uterque vero electus suos legatos ad Romanam curiam destinavit
pro confirmatione a summo pontifice impetranda. Sed dominus papa nolens in partem aliquam
declinare, ne forte pax Ecclesie turbaretur, de consilio cardinalium sub specie deliberandi
distulit super questionem tantorum principum diffinitivam sententiam promulgare.
Anno Domini 1258, multi clarissimi viri de Brixia exaltationem sancte matris Ecclesie
affectantes cum tirannidem adverse partis per biennium tolerassent, tandem, sicut viri strenui
et elati, exponere personas periculo elegerunt potius quam vehementissimo timore continue cruciari.
Timebant enim quotidie ne a suis adversariis in manus perfidi Ecelini Brixia traderetur.
Tunc latenter ad Legatum et Marchionem, qui tunc erant Padue pro exercitu ordinando
contra pestiferum Ecelinum nuntios direxerunt, ipsos attentius exhorantes, ut parati essent eis
prestare subsidium in die prefixo in quo suos proposuerat invadere inimicos. At illi eorum
precibus libentissime annuentes, in tempore assignato magnifice in eorum auxilium perrexerunt.
Predicti vero fideles Ecclesie utpote viri providi et experti, timentes plurimum, ne pars
adversa eorum deprehenderet audaciam per aliquam coniecturam et, habita occasione, pessimum
Ecelinum et Pelavicinum in suum auxilium convocaret, duobus diebus ante terminum
constitutum secundo scilicet die exeunte aprili, circa solis occasum arma subito rapientes,
et more leonum audaces, inimicos viriliter invaserunt, eosque per totam noctem viriliter expugnantes,
ante horam tertiam diei sequentis plenissimam de ipsis victoriam sunt adepti, et
fere omnes autores scelerum, Grifolinum etiam potestatem Brixie capientes, eos in vinculis
coniecerunt. Comes itaque Sancti Bonifacii, egregie indolis adolescens, paterne probitatis
impiger imitator, audiens Brixienses esse sub armis, cum parte militie mantuane in inimicorum
auxilio est profectus. Post tres vero dies Legatus et Marchio in manu valida Brixiam
intraverunt, et ibidem tamdiu residentiam fecerunt, donec omnia fuerunt disposita secundum
beneplacitum amicorum.
Hec itaque audientes Ecelinus et Palavicinus pariter tremuerunt. Expalluit eorum facies
et ebore intellectus, omnesque eorum fautores per totam Lombardiam capita in terram
pre tristitia deiecerunt. Tota enim spes illorum et desiderium erat Brixiam obtinere, quia
per ipsam vires resumere et inimicos deprimere, totiusque assequi sperabant dominium Lombardie.
Dominus autem, secundum propheticum sermonem, signa faciens irrita divinorum
et vertens ariolos in furorem, ydolatriam Ecelini et Palavicini, qui planetas et signa celi pro
numine venerabantur, sue potentie brachio prostravit pariter et confudit. Non enim Omnipotens
planetis contulit deitatem nec eorum motibus suam potentiam alligavit, sed in se retinuit plenitudinem